Новая культурная акцыя ад музея гісторыі Магілёва — атрымаць кнігу па падпісцы

2012-11-19

Новую культурную акцыю праводзіць музей гісторыі Магілёва. Аб гэтым карэспандэнту сайта паведаміў дырэктар установы Аляксей Бацюкоў. У хуткім часе на сайце музея у фармаце «.pdf» будзе апублікаваны пераклад кнігі 1785 года Крыстафа Готліба фон Мура "Дзіўныя паведамленні ад езуітаў у Беларусі"/Merkwürdige Nachrichten von den Jesuiten in Weißrussland" (Франкфурт-Лейпцыг). Затым арганізатары акцыі плануюць выдаць паўнавартасную кнігу «Паведамленняў». Атрымаць яе магілёўцы змогуць па падпісцы.

Па словах Аляксея Бацюкова, акцыю атрымалася арганізаваць менавіта з дапамогай добрага сябра і актывіста музея гісторыі Магілёва Алега Давіда Лісоўскага (Германія). Спадар Лісоўскі доўга і паспяхова супрацоўнічае з музеем, дапамагае знаходзіць і выкупаць культурныя каштоўнасці. Зараз ён узяўся за пераклад кнігі «Дзіўныя паведамленні ад езуітаў у Беларусі». Зроблены ім пераклад будзе паступова размяшчацца на сайце Музея гісторыі Магілёва. «Пасля завяршэння перакладу мы плануем выдаць усю кнігу, — кажа Аляксей Мікалаевіч. — Для таго, каб атрымаць яе экзэмпляр для сваёй уласнай бібліятэкі, кожны ахвотны можа паведаміць нам сваё жаданне на электронную скрыню музея: Этот адрес электронной почты защищен от спам-ботов. У вас должен быть включен JavaScript для просмотра. ».

«Дзіўныя паведамленні» былі размешчаны на электронным аўкцыёне e-bay, аднак ужо выкуплены іншымі асобамі. Адзін экзэмпляр дадзенага выдання знаходзіцца ў Аддзеле рэдкай кнігі Нацыянальнай бібліятэкі Рэспублікі Беларусь. Электронная копія кнігі ёсць ў вольным доступе ў інтэрнэце.

Выданне «Merkwürdige Nachrichten von den Jesuiten in Weißrussland» уяўляе сабой нямецкі пераклад італьянскай кнігі ў лістах. Аўтарам нямецкага выдання пазначаецца нямецкі гісторык Крыстаф Готліб фон Мур. Кніга апавядае пра складаную і супярэчлівую сітуацыю, што склалася вакол лёсу каталіцкай царквы і Ордэна Езуітаў на тэрыторыях Рэчы Паспалітай, якія адышлі да Расійскай імперыі пасля Падзелу 1772 г. Ордэн, скасаваны папай Кліментам XIV у 1773 г., фактычна працягваў існаваць на гэтых тэрыторыях. Няясным заставаўся і статус каталікоў у землях цяпер ужо Расійскай імперыі, бо ў Расіі не існавала каталіцкайепархіі на той час.

У гэтых умовах Кацярына ІІ стварае Беларускую дыяцэзію ў Магілёве, кіраўніком якой становіцца Станіслаў Богуш-Сестранцэвіч. Беларуская архідыяцэзія будзе прызнаная Рымам на дзесяцігоддзе пазней, і стане самай вялікай у свеце па тэрыторыі. Езуіты, якія захаваліся на беларускіх землях, працягвалі сваю працу і нарэшце дачакаліся ўсясветнага аднаўлення дзейнасці Ордэна. Аднак гэта будзе пазней, а найперш адбываліся інтрыгі, закулісная барацьба і сутыкненні інтарэсаў. Увесь гэты складаны і інтрыгоўны час — у лістах, цыркулярах, рэляцыях, адозвах — пададзены ў кнізе ад першых асоб, якія дзейнічалі ў Ватыкане, Санкт-Пецярбурзе, Магілёве.

Зараз музей вывучае папярэдні попыт і дамаўляецца з выдаўцом, пасля чаго будзе вызначаны кошт выдання.

Рэд.