“ШЛЯХ ДА ЎЗАЕМНАСЦІ”

2012-11-20

15-16 лістапада ў Гродзенскім дзяржаўным універсітэце імя Янкі Купалы адбылася міжнародная навуковая карферэнцыя «Шлях да ўзаемнасці» ХУІІІ. Канферэнцыя была прысвечана эканамічным, моўным, літаратурным, гістарычным, культурным, навукова-асветніцкім узаемаадносінам паміж народамі Беларусі і Польшчы. На пленарным пасяджэнні канферэнцыі выступалі Аляксандр Лукашанец, доктар філалагічных навук, прафесар, дырэктар Інстытута мовы і літаратуры імя Я. Коласа і Я. Купалы НАН Беларусі, Таццяна Валакіціна, доктар гістарычных навук, прафесар, г. Масква,Леанарда Дацэвіч, доктар філалагічных навук, прафесар, г.Беласток, Мікалай Даніловіч, доктар філалагічных навук, прафесар, г. Гродна, Мікалай Салохін, кандыдат філалагічных навук, прафесар, г. Омск. Пасля ўрачыстага адкрыцця і пленарнага пасяджэння работа ўдзельнікаў карферэнцыі працягвалася па секцыях.

Настаўнікі школы № 2, Шпартава Таццяна Мікалаеўна, настаўнік беларускай мовы і літаратуры, Ткачова Анастасія Іванаўна, настаўнік польскай мовы і літаратуры, прынялі ўдзел у рабоце канферэнцыі. На секцыі «Літаратуразнаўства. Дыялог праз стагоддзі» настаўнікі выступілі з дакладам «Беларусь і Польшча на скрыжаванні стагоддзяў: ад класікі да сучаснасці». У сваім дакладзе настаўнікі закранулі пытанні выкладання ў сучаснай школе беларускай і польскай літаратур ў адзінстве. Настаўнікі звярнулі ўвагу на тое, што вывучэнне беларускай літаратуры ў цеснай сувязі з польскай — неабходнасць. Гэта дапамагае параўнаць ці прасачыць узаемаўплывы розных аўтараў ці разгледзець, як розныя творцы падышлі да вырашэння адной тэмы, праблемы. Настаўнікі дзяліліся сваімі напрацоўкамі ў выкладанні вуснай народнай творчасці на ўроках польскай і беларускай літаратуры, у выкладанні творчасці В. Дуніна-Марцінкевіча, Адама Міцкевіча, Элаізы Ажэшкі, Максіма Танка і яго цеснай сувязі з польскай літаратурай. Асаблівая ўвага была звернута на тое, што вучні нашай школы актыўна падтрымліваюць культурна-гістарычныя ўзаемаадносіны двух народаў. На працягу двух гадоў яны прымаюць актыўны ўдзел у святкаванні гадавіны бітвы пад Леніно, у якой поплеч з беларускімі салдатамі мужна змагаліся і загінулі польскія салдаты пяхотнай дывізіі імя Тадэвуша Касцюшкі. У вёсцы Леніно знаходзіцца мемарыяльны комплекс польскім салдатам, куды кожны год 12 кастрычніка прыязджае польская дэлегацыя, каб разам з беларускім народам ушанаваць памяць воінаў, якія загінулі тут, і аддаць даніну павагі іх бессмяротнаму подзвігу. Гэтае свята аднолькава дорага беларусам і палякам і з’яўляецца своеасаблівым сімвалам беларуска-польскай садружнасці.