«Маё натхненне — жыццё»: выстава магілёўскага мастака Юрыя Несцярука адкрылася ў Мастацкім музеі імя П.В. Масленiкава

2026-02-19

У Магілёўскім Мастацкім музеі імя П.В. Масленікава адкрылася выстава магілёўскага мастака Юрыя Несцярука «Вясковы супрэматызм».

Юрый Міхайлавіч — мастак-манументаліст, таленавіты педагог, удзельнік шматлікіх абласных, рэспубліканскіх і міжнародных праектаў, адзін з самых яркіх прадстаўнікоў сучаснага выяўленчага мастацтва Беларусі. Член Беларускага саюза мастакоў.

У экспазіцыі прадстаўлены жывапіс, графіка, скульптура і калаж магілёўскага мастака з розных перыядаў яго творчасці. Выстава ўключае работы з аднайменнай серыі цыклаў «Рыбны дзень», «Родныя мясціны». Творы выкананы ў розных жанрах, стылях і тэхніках.

— Маё натхненне ў творчасці — гэта жыццё. А ў нашым горадзе Магілёве мяне натхняюць музеі, бо яны захоўваюць гісторыю, — адзначыў Юрый Несцярук.

На ўрачыстым адкрыцці галоўны спецыяліст упраўлення культуры Магілёўскага аблвыканкама Анастасія Радоўская ўручыла мастаку ганаровую грамату за шматгадовую плённую працу, высокi прафесiяналiзм, значны асабiсты ўклад у развiццё галiны культуры.

Творы мастака — гэта разважанне пра малую радзіму, культурна-гістарычную спадчыну краіны і важнасць іх захавання.

Фота аўтара

mogilevnews.by