Вучымся роднай мове

2016-09-12

На вялікі жаль, мы — беларусы — вельмі рэдка гаворым на роднай мове. Для таго, каб выправіць гэты кур’ёз, у дзяржаўнай установе адукацыі «Сярэдняя школа № 28 г. Магілёва» было прынята рашэнне: кожны чацвер і вучні, і настаўнікі будуць старацца размаўляць на беларускай мове.

Зразумела, што часам гэта складана, а часам і словы падбіраць і ўспамінаць прыходзіцца. Але, як у любой добрай справе, і тут знайшліся памочнікі — настаўнікі беларускай мовы, якія ўстанавілі своеасаблівае дзяжурства па чацвяргах. І цяпер кожны чацвер будзе прысвечаны якой-небудзь тэме. Так, першым «дзяжурным па роднай мове» стала Алена Вадзімаўна Асадчая. З яе лёгкай рукі 8 верасня ўсіх, хто прыйшоў ва ўстанову адукацыі, сустракалі дзяўчаты, апранутыя ў нацыянальныя касцюмы, і ўручалі лістоўкі-памяткі, дзе былі напісаны розныя формы прывітанняў. Пачатак раніцы выдаўся напружаным, а затым усё пайшло як па масле! Па ўсёй школе гучалі словы: «Дзень добры!», «Добры дзень вам у хату!», «Шчыра вітаю!».

Побач з рамонкам «Вітаемся па-беларуску» пастаянна тоўпіліся вучні, а часам і настаўнікі звярталіся за дапамогай да юных кансультантаў роднай мовы.

Вось так весела і з карысцю прайшоў першы ў 2016/2017 навучальным годзе беларускамоўны чацвер у сярэдняй школе № 28 г. Магілёва.

Святлана Грынёва,
намеснік дырэктара па вучэбнай работе
ДУА «Сярэдняя школа № 28 г.Магілёва»