На выставу ўсім класам

2013-11-21

19 лістапада вучні 6-х класаў установы адукацыі «Сярэдняя школа № 35 г. Магілёва» наведалі выставу «Зямля — аснова ўсёй Айчыне» з фондаў дзяржаўнага літаратурна-мемарыяльнага музея імя Якуба Коласа, якая адкрылася ў Магілёўскім абласным краязнаўчым музеі. Увазе школьнікаў была прадстаўлена ўнікальная экспазіцыя, якая змяшчала карціны, кнігі, афішы, асабістыя рэчы і нават перапіску беларускага песняра з выхаванцамі Чавускага дзіцячага дома. Беларускія ручнікі, гліняны посуд, калаўрот надалі выстаўцы атмасферу цяпла і ўтульнасці.

Якуб Колас з партрэта, як сапраўдны гаспадар выставы, «сустрэў» школьнікаў адразу з парога. Тут жа, каля партрэта, шасцікласнікі мелі магчымасць пазнаёміцца з выданнем паэмы «Новая зямля» на беларускай, рускай і польскай мовах. Карціны беларускага мастака Ул. Сулкоўскага з серыі «Радзіма Якуба Коласа» па-мастацку дасканала перадаюць атмасферу тых мясцін (Акінчыцы, Ласток, Альбуць), дзе нарадзіўся і вырас народны паэт Беларусі. Сёння ўжо не захавалася лесніковых сядзіб, інтэр’ераў, у якіх правёў сваё дзяцінства будучы паэт, і таму карціны мастака маюць асаблівае значэнне: яны дапамагаюць падрастаючаму пакаленню ўбачыць усё гэта ў тым выглядзе, у якім яно існавала насамрэч 130 гадоў таму.

Пазнаёміліся наведвальнікі выстаўкі і з выданнямі паэмы «Новая зямля» — бессмяротнага твора Якуба Коласа. Ёй прысвечана другая частка экспазіцыі. Дарэчы, у гэтым годзе споўнілася 90 год з выхаду гэтай паэмы асобным выданнем. Ілюстрацыі народнага мастака Беларусі Ул. Шаранговіча нагадалі вучням і дарэктара, і дзядзьку Антося, і самога Костуся. Акрамя гэтай паэмы на выставе былі прадстаўлены і іншыя творы пісьменніка, перакладзеныя больш чым на 40 моў свету.

Завяршыла выставу экспазіцыя, прысвечаная тэме «Якуб Колас і Магілёўшчына». Школьнікам было цікава паслухаць аб тым, што пісьменнік не аднойчы бываў на Магілёўшчыне і нават некаторы час працаваў настаўнікам у прыватнай школе.
Хочацца выразіць словы ўдзячнасці арганізатарам выставы і супрацоўнікам абласнога краязнаўчага музея. Веды, атрыманыя ў час наведвання выстаўкі, школьнікі з поспехам могуць выкарыстаць на ўроках роднай мовы і літаратуры.

Класны кіраўнік 6 «Б» класа,
кіраўнік гуртка «Юны карэспандэнт»
Бялясава А.А.