Cустрэча з пісьменнікамі Магілёўшчыны

2015-03-02

На мінулым тыдні дзяржаўная ўстанова адукацыі «Сярэдняя школа № 8 г. Магілёва» сустракала гасцей: да вучняў завіталі ў госці пісьменнікі, сябры Саюза беларускіх пісьменнікаў Міхась Булавацкі, Яраслаў Клімуць, Сяргей Украінка, Мікола Яцкоў, а таксама сябра Саюза пісьменнікаў Беларусі Алесь Казека.

Мікола Яцкоў, Яраслаў Клімуць, Сяргей Украінка, Алесь Казека, Міхась Булавацкі.

Ва ўтульным кабінеце беларускай мовы і літаратуры на цікавую размову пра беларускасць, родную мову і яе значэнне ў нашым жыцці сабраліся вучні 5-11-х класаў разам з настаўнікамі Святланай Анатольеўнай Грахольскай, Святланай Мікалаеўнай Рабавай, Наталляй Леанідаўнай Прасаловіч.

Яраслаў Іванавіч Клімуць пазнаёміў навучэнцаў з альманахам магілёўскіх літаратараў «Брама» і выказаў надзею, што сёняшнія вучні, калі будуць імкнуцца займацца літаратурнай творчасцю, у будучым абавязкова будуць друкавацца ў "Браме«і іншых беларускіх выданнях.

Міхась Булавацкі расказаў пра беларускае пяціборства, якім кіруе шмат гадоў, запрасіў вучняў да ўдзелу ў ім і правёў літаратурную бліц-віктарыну па творах Максіма Багдановіча і Янкі Купалы. Перамог у віктарыне вучань 7 «В» класа Ілля Белавусаў, які атрымаў з рук спадара Міхася яго кнігу з аўтографам.

Міхась Булавацкі віншуе Іллю Белавусава

Гучалі вершы і празаічныя творы ў аўтарскім выкананні. Пісьменнікі адказалі на разнастайныя пытанні вучняў і перадалі падарункі — альманах «Брама» з аўтографамі прысутных, часопіс «Дзеяслоў» і свае кнігі.

І завяршыла сустрэчу аўтограф-сесія.

Настаўнік беларускай мовы і літаратуры
дзяржаўнай установы адукацыі
«Сярэдняя школа № 8 г. Магілёва»
Грахольская С.А.