Школа запрашае на кірмаш

2015-10-14

Восень паўнапраўнай гаспадыняй гуляе па гарадах і вёсках нашай краіны. У народзе гэта час сельскагаспадарчых кірмашоў. А кірмаш — гэта заўсёды сапраўднае свята!

Так, з раніцы 10 кастрычніка на пляцоўцы каля дзяржаўнай установы адукацыі «Сярэдняя школа № 35 г. Магілёва» гучала музыка, якая збірала гасцей на кірмаш «Залатая восень». Штогод гэта свята праводзіцца з мэтай захавання і адраджэння гісторыка-культурнай спадчыны, папулярызацыі нацыянальных традыцый сярод школьнікаў і жыхароў мікрараёна школы. Таму ўдзел у кірмашы традыцыйна прымалі не толькі вучні і педагогі школы, але і бацькі нашых выхаванцаў. Кожны класны калектыў аформіў сваю «гандлёвую кропку» малюнкамі, букетамі кветак, садавінай і гароднінай, а таксама рознымі прысмакамі: пірагамі, дранікамі, пячэннем, цукеркамі, мёдам, гарачай гарбатай.

Кірмаш прыцягнуў увагу жыхароў мікрараёна школы. І хутка школьны двор напоўніўся маладымі маці з каляскамі і людзьмі пажылога ўзросту.
Добры настрой удзельнікам кірмашу і яго гасцям стварыў і святочны канцэрт. Многія з прысутных не толькі слухалі песні. Пад спевы вучні пачатковых класаў з кіраўніком тэатральнага гуртка вадзілі карагоды, а старэйшыя — падпявалі тым, хто выступаў на імправізаванай сцэне. Звонкія галасы маладых талентаў удзельнікі кірмашу ацанілі гучнымі апладысментамі. Не засталіся без увагі і спартыўныя спаборніцтвы, якія праводзілі настаўнікі фізічнага выхавання на школьным стадыёне.

Словы шчырай падзякі тых, хто завітаў на кірмаш, сведчаць пра высокі ўзровень падрыхтоўкі свята з боку адміністрацыі і педагагічнага калектыва, іх пільнай увазе арганізацыі пазашкольнай дзейнасці вучняў, выхаванню нацыянальнай самасвядомасці і захаванню традыцый беларускага народа.

Бялясава А.А., настаўнік беларускай мовы